على أمل العودة

الأيام بتتغير ، الظروف بتتغير ، الشخصيات ممكن تتغير و كمان المبادئ ، وسط كل التغييرات دى بتروح ناس و تيجى ناس ، بس الصعب إنك تخسر ناس . فى ناس زى ما بتروح زى ما بتيجى مبتفرقش معاك ، لكن فى ناس بتروح و سايبة جواك كل حاجة حلوة و كل ذكرى طيبة ، بس للأسف مش هتيجى تانى ! أقدار ، كلنا بتحكم علينا أقدارنا و أقدار غيرنا بشكل الحياة مع الناس دول . المشكلة إنك تزعل على اختفاؤهم و متقدرش تلوم حتى علشان هما مفيش فى ايديهم حاجة و ده نصيبكم لحد هنا .
مش دايما بيكون فى شخص غلطان علشان اتنين يتفرقوا و لا دايما يبقى عدم التوافق هو سبب الفراق ، أسباب كتير جدا واردة .
زى مثلا فى مسلسل حكايات بنات لما هشام منع مراته " مريم " إنها تكلم كاميليا رغم حبهم و صداقتهم الطويلة جدا و مع ذلك خضعت مريم ل رغبة هشام فى موقف كلنا من بره نقدر نزعق و نقول لأ هى ازاى تخضع و ازاى تسيب حياتها لحد يتحكم فيها و فى المقابل أننا لو مكانها كان هيبقى تصرفنا مختلف و عمرنا ما نقبل بالوضع ده ، رغم ان أغلبنا لو مكانها هيتصرف زيها بالظبط و بنفس الدافع - مش خوف - دافع الحب و الإرضاء ، بس .. لإنها بتحبه .
أسباب كتير بتبعدنا عن اللى بنحبهم بس المهم إننا لو اتحطينا فى موقف مهما اختلف السبب ، و كانت النتيجة أننا هنفارق بنفارق و نسيب ذكرى حلوة و ناخد معانا الذكرى الأحلى ، ذكرى حبايبنا ، ذكرى صورة محفورة جوانا ، ذكرى حوار أو شات أو كومنت أو تويتة أو حتى أسى وقفنا فيه جنب بعض ، ذكرانا

خليك قدها

طالما اختارت واحدة ناضجة بعيدة عن عالم المحن و " مش ليك دحوة و زحلانة " ، خليك قدها ، أما بعد : 

-          الاهتمام بيفرق معاها جداً ، الاهتمام اللى بجد مش مجرد تقضية واجب.

-          متحاولش للحظة إنك تقلل من طموحها أو تسخر منه .

-          شاركها فيه و لو حتى بمجرد سؤال و متابعة لشغفها بيه .

-          لو لقيتها بتفكر فى مليون اتجاه متقللش من عزيمتها و تقولها صاحب بالين كداب ، بس ممكن تقولها احنا ممكن نرتب أفكارنا علشان نحقق أعلى حاجة فى كل حاجة . – و بالمناسبة مفيش حاجة اسمها صاحب بالين كداب – .

-          وقت ما تحس إنك بطلت تهتم هتبدأ تكرهك ، و وقت ما تحس إن اهتمامك ده كان مصطنع هتمسحك من حياتها .

-          اوعى تهينها ب كلمة مش محسوبة لأنها حتى لو سامحت مش هتنسى و وقت الزعل بجد هتطلع لك القديم و الجديد .

-          إياك تحاول تجرح كرامتها ، لأنها لو عدتهالك مرة ، التانية هتبقى الأخيرة .

-          خلى بالك إن فى فرق بين الغيرة و التملك ، و كمان متنساش إن إحساسك بالثقة فيها بيزودها ثقة و اتزان .

-          تأكد إن هدمك لطموحها اللى عاشت تحلم بيه كل لحظة هو بداية هدم لأى حاجة فى حياتكوا حتى لو عاشت تحلم بيها كل لحظة ، لأن ببساطة شوف قدر اللى اتخلت عنه و قيس عليه .

-          مش هتنساك و تهتم بطموحها بس ، على قد طموحها هتتمنالك أكتر و على قد انبهارك بيها هتتمنى تنبهر بيك أكتر ، ف خليك الشخص المبهر اللى فعلا يستاهل انبهارها .

الأفكار قابلة للزيادة ، بس فى الأول و فى الآخر اختارت حاجة خليك قدها .

واحد صحيح

لتصبح الأنانية سيدة العلاقة . يرى فى نفسه كل مقومات الرجل الجذَّاب فيذهب ليقطف من كل امرأة أجمل ما بها دون أن يبالى إن كانت ترضى بالجزء المخصص لها منه أم لم ترضى .

فقط يفكر كيف يصبح الأسعد مع من سيرسى عليها مزاد الصفة الملكة اليوم ، ثم ... يذهب إليها من حيث تُفَضِل و يبدأ هو فى تنفيذ الخطة المناسبة لها فقط ، و بكل سهولة و لأنها الطرف الأضعف بالحب ، لحظات و تركع تحت قدميه لتحقق له رغبته الخاصة بها .

و فى النهاية يجمع هو بين هذه التى تحقق له رغبة الحب ، و تلك التى تحقق رغبة التملك ، و تلك التى تجعل من رجولته بطولة و يصبح الرجل الأهم فى العالم ، و منهن من تقنعه بوسامته لدرجة الغرور ، و هذه التى قررت أن تحقق له رغبة الجنس " Mrs perfect  " .

فى جميع الأحوال يطمئن ، يعرف أنه إذا ترك هذى يذهب إلى أخرى . و إذا حاول مرة أن يُفَكِر بضميره تجاه إحداهن سيجد ألف مبرر و مبرر يجعله الوحيد الأحق بكل شئ .

عصر الآلهة ( مريض بالإنسان )

نعيش يومنا هذا عصر اشبه بعصر الآلهة ، الفارق الوحيد و الأبشع هو تأليهنا للأشخاص على عكس القدامى ممن ألهوا الأصنام .

أصبحنا نعطى للشخص المكانة و القوة و القدرة لأن يسحقنا و بشتى الطرق ، فمنهم من نعطيه كل الحب و التمجيد ليتمكن بـ تصرف واحد - ناتج عن خطأ بشرى – أن يحطم تمثاله بداخلنا ، لنجد أنفسنا نتحطم وراءه . و منهم من نُمسِكَه زمام أمورنا ليصبح الآمر الناهى فى أحلامنا و طموحنا و حتى فى حقوقنا و نستمتع كل لحطة نرى فيها تحولنا لـ جماد بلا كرامة و لا رأى و لا نزعة .

أما من نُسَلِمه الأهم و هو العقل ، فيصبح رأيه هو الأصح و نسير خلفه أينما ذهب دون أدنى تفكير ، لنرى حطام عقولنا يندثر حولنا و لا نبالى .

و منهم من أمتلك كل المقومات لنسلمه القلب و العقل و القيادة و حتماً سيذهب بنا إلى الهاوية !!